كئفيم اولسون
بير گون مني قانداللاياجاقلار، كئفيم اولسون
دوستاقلارا پاي يوللاياجاقلار، كئفيم اولسون
آرخامدا چوخور باختيما نيسگيل دولاجاقدير
كؤلگهمده اؤلوم ياللاياجاقلار، كئفيم اولسون
بير قورخو اؤلوم گلدي اجل تابوتو داندي
مرمييله ياشام توللاياجاقلار، كئفيم اولسون
من گؤينهييرهم ائل ياراسين درد تاماهيندان
كؤكسومده شافاق ساللاياجاقلار، كئفيم اولسون
ائل ساغليغينا آغري ايچيب كئفلهنيرهم من
قان قورشاغيمي خاللاياجاقلار، كئفيم اولسون
داي،سئودا نهدير دار باجاسيندان ايشيق آلماق
اول گون كي گونش داللاياجاقلار، كئفيم اولسون
Kefim olsun
Bir gün məni qandallayacaqlar, kefim olsun
Dustaqlara pay yollayacaqlar, kefim olsun
Arxamda çuxur baxtıma nisgil dolacaqdır
Kölgəmdə ölüm yallayacaqlar, kefim olsun
Bir qorxu ölüm gəldi əcəl tabutu dandı
Mərmilə yaşam tullayacaqlar, kefim olsun
Mən göynəyirəm el yarasın dərd tamahından
Köksümdə şafaq sallayacaqlar, kefim olsun
El sağlığına ağrı içib keflənirəm mən
Qan qurşağımı xallayacaqlar, kefim olsun
day, sevda nədir dar bacasından işıq almaq
O gün ki günəş dallayacaqlar, kefim olsun
شاعير: عيسي زيني