+ به يه ن

هـــــــه يــــــوخ بلـــــــــي ... !

 آلتي ياشيمي قورتارماقدايديم، او گونلر آنام ائوده دئييردي: اوغلوم مكتبه گئده جك ، درس اوخويوب دوكتور اولاجاق.قارداشيم دئييردي يوخ اؤيرتمن اولاجاق درس دييه جك،  هره بير سؤز دئييردي، من ايسه ... گيجه ليب قالميشديم .

بيرينجي گون ايدي، آنام مني مكتبه آپاريريدي و من آغلايار كن آنامدان آيريلماق ايسته ميرديم ، بير آن گؤزومو آچيب اؤزومه گلديكده، گوردوم مكتبده اوتورموشام و اوشاقلار منه باخيرلار بير آزدان سونرا اؤيرتمن ايچه ري كئچدي، اوشاقلارين آديني سوروشماغا باشلادي.  فيكريم اوزومده دئييل ايدي،  اؤزومه گلمه ميشديم هله. 

بيردن اؤيرتمن سينيرلي بير حالدا  سوروشدو:

سنين له دييله م...؟ آدين نه دير ..؟ دئميره م آدين نه دير ...؟

من  كي  اوره ييمي  قورخو آلميشدي بيردن اؤزومه گلديم دئديم:   هه ...!؟  هه...!؟  نه مه نه...!؟

اؤيرتمن يئريندن قالخيب منه ساري گلدي  و الينده كي ياش چوبوغو منيم باشيما چيرپاركن دئدي:  هه ...! هه ...! ائششه كله دانيشيرسان  هئچ اوتانميرسان، منه هه دئييرسن...؟ هه يوخ بلي  بيرده ائشيد مه ييم  داها هه دييه سن  ... بيلدين ...؟

من بوتون قورخولاري اوره ييمده حيس ائدر كن  بير داها  چيغيرديم هه آقا هه .

او  گون  او ساحات اؤيرتمن مني بير  آياغي گؤيده، زنگين آخيريناجاق تاختا قاباغيندا ساخلادي. اوندا من اؤز كيچيك دؤشونجه م ايله دوشوندوم، داها  دونيام دَييشير، داها خوش گونلريمده ن خبر يوخدو، شن آنلاريم سونونا يئتيب .

هه!!!  بونو دوشوندوم،  هه ... يوخ بلي ...!