+ به يه ن

دوستاقدا اويانيش

يالوارما منه ، سني ائشيتمك ايسته ميره م، قارنيمين آج ليغيني و عاييله مين گؤز دانيشيغيني ائشيديره م بس دير، اوشاغيم گئجه يئمه ك گؤزله يير، سني ائشيديم يا ال لريمه  تيكيلن گؤزلري ...!؟

بونلاريني ائشيديب بير ديبده سوسدوم و سسيمي چيخارتماديم ، دؤشونمز بيلديگيم بير اينسانين سؤزؤ مني سوسدوردو، عاييله سيني سئويردي ، اونلارين آج قالماماغينا چاليشيردي،

دونيانين توتساقدا اولماغيني بئله آنلاماميشديم، بير نئچه گون اولاردي بوردايديم، اؤزومو حاقلي بيله‌ره‌ك يئمك لريني‌ ده يئميرديم، بير ايچيم سودا ايچمه ميشديم هر گون سورغولار باشلانيردي . ...

 كيمسن ؟ كيمه ايشله ييرسن؟ دوستلارين كيمدير؟ كوكون هارا باغليدير؟ دؤيولمك يئمه گيم و سورغولار ايچدي ييم سو اولموشدو و منيمده جوابيم بيلميره‌م نه دئييرسيز! كيمدن دانيشيرسينيز!؟ نه دوست؟ نه دوشمان؟ من هئچ نه بيلميره‌م، مني باشقا بيري سي ايله  ده ييشيك توتوبسونوز.

مأمور: خيياواندا سني توكولموش اعلانلارين قيراغيندا توتموشوق، سن دئييرسن من هئچ نه بيلميره‌م !؟ بئش گون آرتيق بيزيمله قالسان هر نه يادينا دوشه‌ر! آپارين بونو.

بير داها دوستداغا آتيلديم و محكوم اولدوغمون عيللتيني يئنه ده آنلاماديم

دوغروداندا مني باشقاسي ايله ده ييشيك توتموشدولار، من صوبح آچيلار كن ائودن ائشيگه چيخديم، چؤره‌ك آلماغا گئديرديم، كوچه‌ني آشيب خياوانا يئتيشينجه چوخلو كاغاذ زيبللري يئرده گؤردوم آنجاق شك ائله مه ديم، خياوانا يئتيشه‌ركن بير آغ آرابا قاباغيمدا ساخلادي، ايكي سيلاحلي مني قورخوزوب و تهلؤكه لي بير حالدا آرابايا باسديلار، يولدا گئدركن باشيما بير توربا گئيديرديلر و من قورخودان چيغيرا - چيغيرا سوروشوردوم: منيمله نه ايشينيز وار؟ من سيزه نئيله‌ميشم؟ مني هارا آپاريرسينيز؟ و بئله سورغولار. آنجاق كيمدي منيم سؤزؤمو ائشيده‌ن !!!

گونلر كئچيردي و من دوستاقلي گونلريمي مامورلارين دئديگي سوزلره فيكيرله شيرديم. اعلانلارين يازيسي نه دير كي بونلاري بئله قورخويا ساليب !!!؟ اعلانلاري يايانلار كيملريميشلر!!!؟ اونلارين ايسته‌يي بو ايشده‌ن نه ييميش !!!؟ بونلار منيم دوشونجه لريم و دوشونمه ديييم سورغولاريدي.

بيرگون مني گؤده‌ن ماموردان بير سؤز سوروشدوم: احمد آقا (مأمورون آدي احمد ايدي) بونلار دئديگي اعلان نه منه دير؟ من هئچ اونو گؤرمه ميشم، اعلاندا نه يازميشلار كي!؟ مني و خيياوندان كئچه نلري توتوبلار!؟

اعلاني يازانلار ايسته ييرلر حكومتي ييخسينلار، آنجاق يوخو گؤرورلر، بيز واريق حكومت ييخيلماز،

بير داها سوروشدوم آخي اونلارين يازديقلاري نه منه دير؟

مني بئله جوابلادي:

والله من هئچ اؤزومده بيلميره م، هرنه يازميشديلار فارسي يازيلماميشدي منده اوخويا بيلمه ديم .

بير داها دئديم : سنين يولداشلارين مني بيلمه ديكلرينه توتوبلار !!!؟ هه هه هه ه ه ه ... باخ منه هئچ ايسته ميرسن بيله سن او اعلانلاردا نه يازميشلار !!!؟ سن نه بيليرسن كي اونلار دوغرو يازماييبلار !!!؟

احمد : نه،  نه منه؟ دينمه دانيشما.

بونو دئدي و گئتدي

نئچه گون سووشدو و من احمد كيشي ايله يولداشليق قوردوم. بير گون احمده دئديم منه او اعلانلارين بيرني گتيريرسن ؟؟؟ قورخدو و دال – دالي چئكيلدي . دئدي :

سس  ... سس ائيله مه، بيلسه لر مني ايشيمده ن چيخارديب، باشيمي اكه للر. قوي گؤروم نه اولور، گؤروم نه ايش گؤره بيله ره م.

ايكي گونده ن سونرا احمد منيم يئمه گيمين قيراغيندا بير كاغاذ منه وئردي، دئدي: بودا او اعلانين باسماسي (كپي سي)، اوخويوب منه ده دييه رسن آنجاق گيزلي.

قورخا - قورخا يئمه گيمي آلديم و كاغاذي پتيمين آلتيندا گيزلتديم، گئجه يئتيشدي و من كاغاذي اوخوماق اؤچون چوخ ماراقلي ايديم. اوخودوم

باشليغيندا يازميشديلار: قيزيلدان اولسا قفسيم    آزادليقا وار هوسيم.  توركي يازميشديلار چوخ گؤجه نديم آنجاق اوخودوم عرب اليفباسي ايله يازيلميشدي و من اونو اوخودوم . اعلاني يازانلار يالنيز ديللريني ايسته ييرديلر يا بئله دئييم ديليميزي ايسته ييرديلر. اوندا حكومتين يازديقي آنا ياسايا تأكيد ائديب و ديليميزين مكتبلرده اوخونماسيني ايسته ميشديللر. و سونوندا بئله يازميشديلار: ديل ميلتين وارليغيدير او زامان كي ديل يوخدو ميللت يوخدو.

اعلاني اوخودوم و اعلاني يازانلاري حاقلي گؤردوم، او گئجه منيم ياشاييشيم دئييشدي، داها باشقا بير باخيشلا حاكميته باخيرديم و مني دوستاقلايانلارا يابانجي و دؤشمن گؤزونده.

فيكريمده دئييرديم: بوردان چيخسام، ديليمي اؤرگنمه يه چاليشاجييام، هرنه اولور اولسون.

و من ...

بو گون دوستاقدا دئييره م و فخر ائديره م كي توركم، آذربايجانلي يام و بير ميللتچي‌ايم